Njuoska bittut -guovttos Suvi West ja Ánne Kirste Aikio loaiddasteaba Turkus Lulli-Suomas Down By The Laituri (DBTL) -festivála oaivelávddis bearjadaga 27. beaivve suoidnemánus. Seammás soai govveba osiid Njuoska bittuid čuovvovaš tv-ráidui.
– Dát lea vuosttaš geardi, go Njuoska bittut loaiddasta musihkain. Moai galge čájehit DBTL:s munno ođđa discobihtá. Šaddá somá, lohká Ánne Kirste.
Seammá lávddis bearjadaga Njuoska bittut -guoktá lassin loaiddastit maid beakkán artisttat Danny, Kauko Röyhkä, Fintelligens ja JätkäJätkät-joavku.
DBTL-festivála lea ordnejuvvon Turkus juo jagi 1988 rájes. Festivála áigge Turkus lágiduvvojit máŋga sierra musihkkadáhpáhusat sihke Aurajoga gáttis ja sierra klubiin miehtá gávpoga.
Njuoska bittuid ođđa ráidu álgá jorrat tv:s ođđajagimánu 2013 rájes.
– Bargu ođđa tv-ráidduin lea vuolgán hui bures johtui. Giehtačállosa mii leat álgán gárvvistit juo njukčamánu álggus ja ráiddu govven álggii suoidnemánu álggus. Borgemánus vel govvejit maŋemus osiid, muitala Ánne Kirste.